دكتور مُصطفي محمود الله يرحمه له عبارة جميلة بـ يقول فيها:
“لا يشبع أهل الأمل من خيبة الأمل…”
يعني الناس اللي بـ تتعشم في حاجة وتدخل في موضوع ما بدون دراسة فتطلع من الموضوع خسرانة… الناس دي بـ تحب تكرر التجربة… وبـ يبقوا عايزين من جواهم يكرروا نفس التجربة ثاني، ويمكن ثالث ورابع… أو إلى ما لا نهاية
طب همّا ليه بـ يعملوا كدة؟
هل عايزين يضيعوا وقتهم ومجهودهم وفلوسهم على الفاضي مثلا؟ … ولا فيه سبب نفسي خفي بـ يدفعهم لتكرار نفس التجارب اللي فشلوا فيها في الماضي؟
في الحقيقة هما خمس أسباب مش سبب واحد… وطبعًا كلامي كله حـ يكون عن المضاربين في أسواق المال… وإن كان نفس الكلام يمكن إعادة صياغته لتفسير الكثير من تصرفات البشر من حولنا
👈 أول سبب هو- الجهل أو عدم المعرفة… وهنا لازم نعرف إن فيه أربع علوم مهمة لازم المُضارب الناجح يكون عارف عنها وهي (السيكولوجي – كفاءة السوق – إدارة المخاطر – التحليل الفني/المالي) … فلو الشخص خسر في البورصة بسبب عدم معرفته بالعلوم السليمة يبقى في الغالب حـ يرجع ثاني بعد ما يتعلم
👈 ثاني سبب هو عدم مرونة الأهداف… لو الشخص حط لنفسه أهداف محددة وفشل في تحقيقها يبقى في الغلب حـ يرجع ثاني… من الأمثلة على كدة مثلا إصرار البعض على إن البيتـ كوين لازم يوصل لمئة ألف دولار، أو إن الداوجونز لازم يجيب أربعين ألف، وهكذا
👈 ثالث سبب هو الرغبة في الانتقام من السوق… لما المضارب بـ يخسر بيكون عايز يعوّض خسارته عشان ينتقم من السوق اللي خسره في المرة الأولى… فيرجع يدخل ثاني بهدف الانتقام… فيدخل في حالة عند مع السوق… وكأن السوق شخص مش مجرد مجموعة من الأرقام والحسابات
👈 رابع سبب هو اللوم وجلد الذات… فيه نوع من الناس بـ يستلف من اللي حولية فلوس عشان يدخل السوق للمرة الثانية بعد ما خسر فلوسه الشخصية في المرة الأولى… ويكرر التجربة السابقة بالضبط، فيخسر من جديد… وهنا الناس اللي استلف منهم بـ تبدأ تلومه على خسارته وتشير وتأكد له إن هو السبب… النوع ده من الناس بيكون مريض نفسي بدرجة ما… ولازم يعالج نفسه لأنه بـ يأذي نفسه والناس اللي بـ يحبهم
👈 خامس سبب هو الإدمان… وهنا الشخص بيكون مش قادر يبعد عن العالم الافتراضي للبورصة، وعايز يستمر مهما كان الثمن… النوع ده من الناس بيكون عنده في الغالب مشاكل نفسية لها جذور مادية… زي إسقاطات الأهل السلبية… وهنا لازم علاج نفسي
لو حابب تعرف أكثر عن الأسباب النفسية للنجاح والفشل في البورصة، يبقى لازم تقرأ كتاب “سيكولوجية مُضارب”
حتى لو مكنتش مُضارب أو مستثمر في البورصة فأنا متأكد من إن الكتاب ده حـ يفيدك كثير جدًا في التعامل مع الناس والحياة
قريبًا بإذن الله في أبو ظبي
🔸 معرض أبو ظبي الدولي للكتاب
🔹 في الفترة من 22 إلى 28 مايو 2023
🔸 جناح دار إضافة للنشر والتوزيع – D24
