زمان كنت شايف البورصة مكان راقي… رجال أعمال بـ بدل بـ تلمع وكرافتتات وساعات ذهب… ده يقول لده يا إكسلانس والثاني يرد عليه يا باشا… وبعد فترة طويلة من البقاء مع البشر في هذا المكان وبعد ما درست وقريت وفهمت عرفت أن البورصة هي طوفان من فوضى المشاعر… غضب من خسارة قديمة… طمع في مكسب جديد… أمل في مستقبل وهم… فهم خاطئ للواقع… حقد… حسد… نرجسية… وغيره كثير…
البورصة طوفان من فوضى الحواس… وعشان نعدي لبر الأمان لازم يكون عندنا مركب نجاه… سفينة زي سفينة نوح عليه السلام تقدر تشيلنا وتعدي بينا لبر الأمان…
المقالات دي محاولة من العبد الفقير لله إنه يساعد بيها على قد ما يقدر… من خلال تجربة متواضعة في هذا المجال وبعض القراءات في علم النفس وسيكولوجية المضاربين… وحابب قبل ما تبدأ تقرأ معايا إني أوضح مجموعة نقط:
• مجموعة المقالات دي حـ تكون عن سيكولوجية المضارب – الفرد – والدوافع النفسية اللي ممكن تخلي أي إنسان يكسب أو يخسر في السوق… وده موضوع يختلف عن سيكولوجية الجماهير ودراسة سلوك البشر الجماعي…
• أنا مش دكتور نفسي ولا عالم اجتماع عشان تكون المعلومات اللي حـ أعرضها هنا دقيقة ومنهجية… أنا حـ أعرض الموضوع من خلال تجربتي الشخصية وتجربة الناس اللي أعرفها مع كامل الاحترام لمشاعرهم وخصوصيتهم…
• في مجموعة المقالات دي حـ أتكلم عن مشاعر وحالات نفسية… جايز حضرتك تفتكر ساعتها إني بتكلم عنك… وجايز تزعل مني بسبب كدة… فـ عشان كدة بقول من البداية أنا مقصدش حد لا سمح الله… كل المسألة إني عايز أغوص معاكم في أهم موضوع في البورصة وهو شخصية البورصجي نفسه ودوافعه للعمل في المجال ده… مش بـ يقولوا إن التحليل الفني نابع من دراسة سلوك البشر؟
• أنا كتبت المقالات دي بالعامية المصرية لأني حسيت إنها أقرب لقلبي خصوصا وأنا بـ أتناول موضوع حساس ومحتاج مني تركيز كبير عشان يخرج بصورة سليمة ويوصل للقارئ بسرعة… وأعتقد إن الأخوة العرب مش حـ يواجهوا مشاكل كبيرة مع اللهجة المصرية لأنها منتشرة بين العرب بسبب الفضائيات والإعلام…
• معظم كلامي في المقالات دي حـ يكون بصيغة المذكر بس ده مش معناه إطلاقا إن الكلام مش موجة كمان للبنات والستات اللي بـ تقرأ الكتاب… كل الحكاية إني بسهل على نفسي الكتابة مش أكثر… والكلام موجهة لكلا الجنسين… مع العلم بإن فيه اختلاف سيكولوجي بين نفسية المرأة ونفسية الرجل في التعامل مع البورصة… فمثلا د. ألكسندر إلدر Dr. Alexander Elder لاحظ إن الستات بتكون أكثر التزاما بالقواعد من الرجالة… والسبب من وجهة نظره هو أن الست بطبيعتها بـ تخاف أكثر من الرجل… فيكون عندها حرص أكثر والتزام أكبر بالقواعد…
• في الجزء الأخير من الكتاب حـ تلاقي مجموعة من الاختبارات النفسية الهدف منها هو إنك كمضارب في البورصة تتعرف على نفسك أكثر… وتقدر تحط إيدك على المشاكل النفسية اللي ممكن تكون سبب في خسارتك…
• كمان حـ تلاقي شرح لخطة تداول في بورصة العملات “الفوركس” ممكن تساعدك على إنك تنجح وتحقق من خلالها بالتزامن مع التوازن النفسي نجاح مقبول في دنيا المال والأعمال…
• قبل ما أختم المقدمة دي عايز أشكر صديقي محمد شعراوي لأنه عرفني بصفحة الطبيب النفسي والأستاذ الدكتور محمد طه واللي من خلال قراءة كتبه وصلت لمفاتيح رئيسية كانت غايبة عني في موضوع سيكولوجية المضارب… أنا قرأت كتب كثير في سيكولوجية المضاربين لكتاب أجانب بس ما كنتش بلاقي اللي عايز أفهمه عندهم… يمكن عشان اختلاف طبيعة المناخ النفسي بيننا كشرقيين وبينهم كغربيين… كنت بحس دائما إن الأجانب ما عندهمش مشاعر طاغية زينا كعرب…لكن دكتور محمد طه وبالذات كتابه “الخروج عن النص” كمل لي الجزء المفقود من المعلومات اللي كانت وصلاني… فشكرا لك…
يا رب الكتاب يعجبكم
وتحياتي لكل من فهم كلماتي
محمد البرماوي
1 مايو 2017
