لو سألت أي واحد بـ يشتغل بالتحليل الفني عن المشاعر اللي بـ تسيطر على المضارب حـ يرد عليك على طول ويقولك “الطمع والخوف”… عارف الرد جالك بسرعة ليه؟ … لأن اللي سألته قالوا له كده وهو أخذ الكلام وخزنه في دماغه زي ما هو ومن غير ما يفكر فيه… طب هل فعلا مشاعر “الطمع والخوف” هما السبب وراء دوافع البشر للمضاربة في أسواق المال ولا فيه مشاعر ثانية مهمة ومنسية؟ تعالى بينا نشوف الحكاية أيه…
موضوع المشاعر اللي بـ تسيطر على المضاربين في أسواق المال موضوع قديم قدم وجود التحليل الفني لأسواق المال… المضارب المشهور “وليم ديلبرت جان” William Delbert Gann ذكر في أول كتاب من تأليفه عن بورصات المال سنة 1923 إن مشاعر “الأمل والخوف” بـ تسيطر على المضاربين في أسواق المال… وقال في كتابه:
الأمل سيؤدي بأي إنسان يتبعه للإفلاس في سوق الأسهم
Hope will ruin any man who follows it in the stock market
المقصود هنا بالأمل هو عدم الواقعية… وفيه مثل مشهور في التحليل الفني بـ يقول إن الناس الخسرانة بتكون راكبة زحليقة الأمل… حضراتكم عارفين الزحليقة وإنها بـ تسحب الشخص لتحت وهو بيكون سعيد وفرحان بمنظر السماء من فوقه لغاية لما يلاقي نفسه على الأرض!…
سنة 1960 أصدر نيكولاس دارفاس Nicolas Darvas كتابه الأول اللي كسر الدنيا وقتها واسمه “كيف ربحت ملــ2ــيون دولار في سوق الأسهم” How I Made 2,000,000 in The Stock Market وذكر فيه أكثر من مرة موضوع مشاعر “الأمل والخوف”… وده دليل على إن الناس فضلت معتقدة لغاية أيامه إن مشاعر “الأمل والخوف” هي السبب وراء خسارتهم في البورصة…
سنة 1987 ظهر فيلم وول ستريت Wall Street وفيه قال البطل “مايكل دوغلاس” جملته المشهورة:
الطمع جيد
Greed is good
الفيلم مأخوذ عن قصة حقيقية لملياردير أمريكي اسمه “إيفان بويسكي” Ivan Boesky… إيفان كان رجل أعمال من الطراز الأول بس للأسف بنى معظم ثروته من المعاملات المشبوهة في وول ستريت… كان غني لدرجة إنه دخل أفخر مطعم في نيويورك وطلب كل الأطباق الموجودة في المنيو عشان يدوقها!… ألف كتاب عن البورصة اسمه “هوس الاندماج” Merger Mania… وفعلا في مايو 1986 كان بـ يلقي كلمة في أحد الجامعات وقال باللفظ:
لا بأس بالطمع، وبالمناسبة، إنني أريدكم أن تعرفوا أنني أعتقد أن الطمع صحيّ. إنه لمن الممكن أن تكون طماع وتستمر في الشعور بالرضا عن نفسك.
Greed is all right; by the way, I want you to know that I think greed is healthy. You can be greedy and still feel good about yourself
من هنا أو من مكان آخر ظهرت فكرة الطمع في موضوع المشاعر المسيطرة على مضاربي أسواق المال… وتم استبدال كلمة “الأمل” بكلمة “الطمع”…
مارك دوجلاس كاتب مشهور في مجال أسواق المال له مقوله جميلة جدا بتقول:
الطمع هو الخوف من ألا تحصل على ما يكفيك
Greed is fear of not having enough
يعني إيه الكلام ده؟ …
يعني أن جذور الطمع تنبع من خوف الإنسان… الخوف الشديد من الفقر بالذات لو كان ناتج عن تجربه قاسية في الحياة ممكن يخلي الإنسان أناني لأقصى الحدود وميبصش للي معاه على قد ما يبص للي مع غيره… بصراحة التفسير ده عجبني جدا… لأنه بـ يظهر إن الإنسان في حقيقته مهما كان بـ يملك من مال ومهما كان طماع فهو في الآخر كائن ضعيف وجبان لأبعد الحدود…
طب هل مشاعر الأمل والطمع والخوف هما بس اللي بـ يتحكموا في المضاربين في أسواق المال؟
من وجهة نظري الشخصية المتواضعة الطمع بـ يلعب دور كبير مع المبتدئين في أسواق المال… الناس اللي جاية جديد ومفكرة إن الحياة حـ تكون وردية وإنهم حـ يغرفوا من كنز علي بابا J … لكن مع مرور الوقت والتجارب حـ تتلاشى مشاعر الطمع من مسرح الأحداث وحـ يحل محلها مشاعر ثانية حـ تمثل الدافع الأهم لمعظم المضاربين في أسواق المال… المشاعر دي هي مشاعر الغضب الناتجة عن الرغبة في الانتقام من السوق وتعويض الخسائر اللي أعتقد أن الجزء المادي منها لا يتساوى أبدا مع الجزء المعنوي…
خليني أضرب مثال توضيحي… مثلا شاب اسمه أحمد سمع من واحد صاحبه عن موضوع البورصة ولأنه خريج تجارة فكان فاهم الموضوع وقرر إنه يدخل المجال، ولما راح شركة السمسرة استقبلوه بفرحة واحترام فحس إنه شخص مهم ورجل أعمال ناجح ومن هنا بدأ يطمع في العيشة المرتاحة والأمان المادي – عربية، فيلا، فلوس في البنك وخلافه…
لعب حظ المبتدئين دوره مع أحمد وكسب شوية فلوس من أول صفقة… حس بفرحة شديدة وخليط من مشاعر الغرور والأنانية وطلب المزيد من الربح… وبعد كام صفقة تأتي الرياح بما لا تشتهي السفن وتبدأ سلسلة الخسائر… ومع كل خسارة يقول أحمد لنفسه “بإذن الله نعوضها المرة الجاية”… ويتولد جواه في البداية إحساس بالندم على الخسارة يليها إحساس بالغضب من السوق والرغبة في الثأر وهكذا…
ومن هنا تبدأ الدوامة… خسارة تؤدي لشعور مؤلم بالندم… الشعور بالندم يزيد من حالة الغضب والرغبة في الانتقام والتعويض السريع… الرغبة غير المدروسة لتعويض الخسارة تؤدي لمزيد من الخسارة…
مش ده برضوا اللي بـ يحصل مع الناس لما بـ تخسر… لو كانت الخسارة بتولد الخوف ما كنش حد دخل السوق بعد ما خسر… لكن الغضب اللي بـ يتكون بسبب الخسارة بـ يشحن المضارب عشان يعوض… ولأن رد الفعل بيكون متسرع النتائج بتكون مش كويسة…
طب هل في حل للموضوع ده؟ …
أيوه في حل…
• أول خطوة للحل هو أننا نفهم المشكلة المدفونة جوانا… نحاصرها في حيز ضيق… نكشفها لنفسنا قبل ما تنفجر في وشنا…
• ثاني خطوة للحل هي إننا نتعلم التعامل مع المواقف ببرود أعصاب وعدم تسرع… لو دخلت صفقة وخسرت مش لازم تعوضها بسرعة… فوت شوية وقت ما بين الصفقة الخسرانة والصفقة اللي وراها… إبعد شوية عن شاشة الأسعار… اسمع نكتة أو كلم واحد صاحبك… إفصل شوية… ولا إقولك أفصل شويتين ثلاثة…
• ثالث خطوة هي إنك تسجل أخطائك وتكتبها… اكتبها في نوته… اكتبها في ملف ورد… المهم تكتبها وتسجلها… مش عايز أقولك قد إيه الموضوع ده حـ يفرق معاك…
• رابع خطوة هي أنك تفكر وتحلل وتشرَّح أخطائك… جزء من أخطائك حـ يكون صريح وواضح… وجزء ثاني حـ يكون مُركب ومُعقد…
• خامس وآخر خطوة هي أنك تكتب خطة العمل بتاعتك من جديد وتعالج مشاكلك وتحاول تتفاداها المرة الجاية…
لو عملت الخمس خطوات دول صدقني حاجات كثير حـ تتغير جواك وساعتها مش حقول إنك حـ تكسب بس على الأقل مش حـ تخسر زي الأول…
أنا كدة قلت اللي عندي والباقي بتاعك… وخليك فاكر دايما إن البورصة أرقام مجرده من الأحاسيس والمشاعر… عشان كدة لازم تتعامل معاها ببرود أعصاب مش بغضب وتهور…
