سؤال مهم… إيه السبب أو الأسباب اللي بتخلي شخص خسر في البورصة يرجع يشتغل فيها تاني؟ …
والسؤال الأهم هل البورصة إدمان؟ …
الموضوع ده دايما بـ يفكرني بصورة في ذاكرتي للحاج/ رمضان عمري ما حـ أنساها… الحاج/ رمضان كان مُضارب في البورصة المصرية قابلته في بداياتي في هذا المجال… كان راجل تقي وكان بـ يصلي بينا الظهر داخل مقر شركة السمسرة اللي كُنت عميل عندها في الوقت ده… عمري ما حـ أنسى شكله لما كان رايح مرة يحط 5000 جنية في حسابه… الأستاذة أماني اللي ماسكة الخزنة كانت عارفاه كويس وعارفة هو خسران قد إية، فاستغربت لما لقته بـ يطلع فلوس من شنطته وبـ يقولها تحطهم في حسابه… بصت له بـ عينيها الواسعة بنظرة فيها استغراب على تعجب مخلوطين بدهشه… بس ما نطقتش حرف واحد وكأنها عارفة إن مش من حقها تمنعه… وهو رد عليها وقالها كلمة مش حـ أنساها… قال:
– إيه؟ في إيه؟ … عادي!
فأخذت منه الفلوس وسجلتهم عندها وكأنها بترد عليه من غير ما تكلمه وتقوله “براحتك”…
بعد ما عرفت حكايته وإنه خسر كل تحويشة الغربة والسفر في البورصة بقيت مندهش ومستغرب كلمته… يعني إيه كلمة “عادي” اللي قالها دي؟ … والفلوس اللي حطها دي بـ يحطها ليه وهو زي ما هو مفيش جديد في شخصيته… طب عايز يخسر ثاني ليه؟ …
علماء النفس لاحظوا من فترة طويلة إن كثير من الناس لما بـ تتعرض لتجربة مؤلمة بيكون عندهم ميل لتكرار نفس التجربة مرة ثانية لو أتيحت لهم الفرصة… يعني فيه ناس بدل ما تهرب من التجارب المؤلمة بـ ترجع لها ثاني ودي حقيقة علمية وراها أسباب كثيرة… طب ما تيجي نتعرف على الأسباب اللي بتخلي الناس اللي خسرت في البورصة ترجع تفتح حسابات وتشتغل ثاني…
السبب الأول هو إن المُضارب لما بـ يفتح حساب تداول وخصوصا في بداية مشواره في المجال بيكون ضعيف وحاسس إن فيه معلومات وخبرات كثير نقصاه… أو بمعنى أدق بيكون مش مسيطر على الموقف… لما بـ يدخل النِت أو يتكلم مع الناس القديمة في المجال بـ يحس إنه مش عارف حاجة… فلما بـ يخسر بـ يفتكر إن سبب خسايره هو نقص الخبرة… فيقرر يعيد التجربة من جديد بعد ما يتعلم شوية عن المجال…
نروح للسبب الثاني… أي شخص قبل ما يفتح حساب تداول في البورصة بيكون عنده تصور معين لشكل المكسب وقيمته ووقت تحقيقه… بيكون راسم في خياله صورة لنفسه وهو كسبان… مثلا واحد حاطط في دماغه إنه حـ يعمل 100% أرباح كل شهر… وواحد ثاني راسم لنفسه إن المخاطر ما تزيدش عن 25% وهكذا… وهنا لما المُضارب بـ يفتح الحساب ويشتغل بيكون له هدفين… الأول إنه يكسب… والثاني إنه يكسب بالشكل اللي هو رسمه لنفسه… طبعا التجربة الحقيقية بتكون مختلفة عن الخيال… وممكن تحصل أحداث كثير ما كنش المُضارب مخطط لها… وبالتالي حتى لو أنهى المُضارب صفقاته بمكسب بس مش بالشكل اللي رسمه في خياله بـ يتولد عنده رغبة في إنه يفتح حساب ثاني ويجرب حظه ثاني… ولو ما حصلش اللي في دماغه يجرب ثالث ورابع وهكذا… بمعنى إنه بـ يكرر الدخول في السوق بسبب النهايات غير المتوقعة…
السبب الثالث هو الانتقام… لما المُضارب بـ يخسر بـ يحس في البداية بالندم… وفي الحقيقة خسارته المادية بتكون أقل بكثير من خسارته المعنوية… بالذات لو كان شخص واثق من نفسه وداخل معاها تحدي على إن رأيه صح… لما بـ يخسر بـ يحس إنه بـ يخسر نفسه ومش بس فلوسه… عشان كدة بيكون عايز ينتقم من السوق فيدخل ثاني… الغضب اللي جواه بـ يعميه ويخليه مش شايف قدامه…
السبب الرابع جايز يكون غريب شوية بس بـ يحصل في الواقع كثير جدا… فيه مُضاربين لما بـ يخسروا بـ يلوموا نفسهم بصورة مبالغ فيها… ويعملوا إسقاط لكل مشاعر الغضب اللي جواهم على نفسهم وبـ يحسوا إن الخسارة ذنبهم… المُضاربين دول في الغالب حسب ما شفت في الواقع العملي بيستلفوا فلوس فتح الحساب من ناس قريبة منهم وبـ تثق فيهم… واحد يقولك أنا سالف فلوس من أبويا أو عمي أو أمي… وفيه مُضاربين بيستلفوا الفلوس من نفسهم… يأخذ من مصاريف المدارس أو يفك وديعة باسم عياله… وطبعا لما يخسروا بـ يجلدوا نفسهم ويزيد إحساسهم بالذنب… فيبدأ الواحد منهم ينتقم من نفسه عن طريق إنه يكرر نفس الموضوع ثاني… فيفتح حساب ثاني عشان يخسر ثاني و يتأكد أن الذنب ذنبه و الغلط غلطه و إنه يستحق اللي جرا له… المُضاربين دول مرضى نفسيين… ممكن يكونوا مصابين بمرض اسمه “التكرار القهري”… ودول من وجهة نظري محتاجين دكتور فورا…
لما المُضارب يفتح حساب أو أكثر في البورصة ويكون عنده خطة ورؤية وبـ يخاطر مخاطر محسوبة فده شيء كويس جدا ومطلوب… لكن لو كان مش عارف السبب أو الأسباب اللي بتخليه يروح البورصة ثاني برجلية يبقى أكيد هو واقع في مشكلة نفسية كبيرة… عشان كدة أنا شرحت الأسباب الأربعة اللي فوق… لكن لو المُضارب عارف مشكلته وما بيحلهاش يبقى هنا هو أتحول لـمدمن بورصة… في المرحلة دي هو بيكون مستعد يستغنى عن أي حاجة مقابل إنه يفضل في المكان اللي اسمه البورصة… مش مهم بيته ولا ولاده ولا صحابه مقابل إنه يفتح حساب تداول ويفضل موجود… حتى لو ما كنش معاه غير ملاليم حـ يفتح بيهم حساب لإنه أصبح مدمن… والبورصة بالنسبة له هي المكان الوحيد اللي بـ يدي له إحساس بالشبع والراحة النفسية… بـ ينفس فيها عن مشكلة داخلية وبـ يحس فيها براحة نفسية من غير قيود وشروط… المُضارب اللي من النوع ده في الغالب بيكون عنده مشاكل اجتماعية ونفسية… والنوعية دي فعلا ممكن تنتحر و العياذ بالله لو خسر وحس إن مفيش فرصة إنه يفتح حساب ثاني…
إحنا كدة عرفنا بعض الأسباب اللي بتخلي المُضارب الخسران في البورصة يرجع يفتح حساب فيها ثاني… وجايز يكون فيه أسباب ثانية كثير، بس على الأقل إحنا كدة حطينا إيدينا على جزء كبير من المشكلة… والسؤال دلوقت، هل فيه نصيحة ممكن نقدمها عشان ما نوقعش في الدوامة النفسية اللي ممكن توصل لحدود مش كويسة زي التكرار القهري والإدمان؟ …
أول خطوة هو إن المُضارب قبل ما يفتح الحساب جديد يسأل نفسه عن السبب… هل هو حاسس إن عنده نقص في المعرفة… ولا الهدف اللي كان راسمه لنفسه ما اتحققش… ولا عشان ينتقم وخلاص… ولا هو مش عارف ليه هو مكتئب وحزين… والمشكلة الكبيرة لو كانت الإجابة هي خليط من بعض أو كل ما سبق…
ثاني خطوة هي إن المُضارب لازم يبدأ يعالج مشاكله بنفسه…
أول نصيحة في مجال البورصة هي إن لو ناقصك علم ما تدخلش السوق اتفرج من برة لغاية لما تتعلم… واعرف إن فيه ثلاث علوم لازم تكون عندك دراية بيهم… الأول هو التحليل الفني ودراسة حركة الأسعار… الثاني هو التحليل المالي للقوائم المحاسبية… الثالث وهو الأهم من وجهة نظري هو إدارة المخاطر وتحديد حجم الصفقات… الثلاثة دول لازم تتعلم ولو شيء منهم قبل ما تدخل السوق… وكل ما تقرأ أكثر وتتعلم أكثر كل ما حـ تسيطر على وضعك في السوق بصورة أحسن واحتمالات خسارتك حـ تقل…
ثاني نصيحة هي إنك ما تتوقعش من السوق هدف معين… مفيش حاجة إسمها أنا عايز أعمل 100% في الشهر… لأن لو السوق ما كنش مناسب للمتاجرة بالإستراتيجية اللي بـ تعتمد عليها حضرتك حـ تقع في الغلط ومش حـ تلتزم بالإستراتيجية وتدخل السوق عكس القواعد وتلخبط نفسك فتخسر…
تخيل لو فيه صياد قرر إنه لازم ولابد يصطاد كل يوم عشر سمكات… في البداية حـ يحقق هدفه فحـ يكون فرحان… لكن لو قامت نوه في الشتاء والكل نصحه بـ إنه يقعد في البيت وما ينزلش البحر لأنه خطر فهو مش حـ يوافق على الكلام ده لأن عنده هدف عايز يحققه بالعافية… وتكون النتيجة إنه يغامر بروحه عشان عشر سمكات!… الخلاصة هي إننا لازم نرضى باللي السوق بـ يديه لنا في أي وقت وما نحطش سقف توقعات للسوق… لأن السوق متغير ومش على حال واحد…
ثالث نصيحة هي إنك لازم تعرف إن أسواق المال سواء كان اسمها بورصة أسهم مصرية أو أمريكية أو فوركس أو خلافه هي أرقام مجردة تماما من المشاعر والأحاسيس… السوق ما بيزعلش من حد ولا بـ يفرح لحد… لا بـ يكره حد ولا بـ يحب حد… يبقى لو حطيت في دماغك موضوع إن السوق بـ يخسرك تبقى غلطان… وتبقى عامل زي اللي كان سايق عربية وعطلت منه فنزل وقعد يضرب العربية وكأنها بني آدم وبـ تحس!… خليك واقعي تعامل مع السوق على حقيقته… مفيش حاجة اسمها أنا حـ أفتح حساب ثاني عشان آخذ حقي من السوق اللي خسرني فالحساب الأولاني… لو كانت مشاعر الغضب والرغبة في الانتقام هي السبب ورا إنك تفتح حساب جديد في البورصة يبقى المشاعر دي مش في محلها وحـ تخسر ثاني لأنك ما فهمتش حقيقة الخسارة في الحساب الأول…
تعامل مع السوق على حقيقته وخليك واقعي… وبلاش العرق الصعيدي أو التركي اللي جواك تطلعه على السوق…
وزي ما بطلب منك تكون واقعي وما تصبش غضبك وانتقامك على السوق بطلب منك برضه إنك تكون واقعي وماتحملش نفسك أكثر من طاقتها… ودي النصيحة رقم أربعة… إوعى تستلف فلوس من حد عشان تتاجر في البورصة… إوعى تأخذ من فلوس مصروف البيت عشان تدخل السوق… طب تجيب فلوس منين… حضرتك ممكن تفتح حساب خارجي على جنب تحوش فيه كل شهر نسبة معينة عشان فالآخر لما تجمع مبلغ تستخدمه في المتاجرة في البورصة… لو المبلغ زاد يبقى خير وبركة… ولو نقص يبقى أنت مزعلتش حد منك…
من أكبر المصايب في موضوع البورصة إن المُضارب يشتغل بفلوس مش بتاعته أو هو محتاجها قوي لبيته وأسرته… والأحسن عشان نضارب في البورصة إننا نشتغل بفائض مالي، ومش بفلوس بـ نستخدمها في حياتنا الأساسية… كمان ما نستلفش من حد… خصوصا القرايب والصحاب…
حـ يجي واحد يقول لي طب والناس اللي بـ تعمل إدارة حسابات في البورصة والفوركس… أرد عليه بأن فيه منصات محترمة زي MQL5 وZulu trade بـ تعمل الموضوع ده… في المنصات دي العميل بـ يمضي على اتفاقية إنه مسؤول عن اختياراته، عشان لو خسر مايلومش الشركة على خسايرة… كمان الشركة بـ تشتغل معاه بكل شفافية وبيكون شايف كل صفقة بـ تتنفذ على حسابه قدام عينية… ومستوى مدير الحساب اللي هو اختاره وتحليل شامل ومفصل لكل صفقة بـ يعملها… هي دي إدارة الحسابات الصح…
خامس وآخر نصيحة هي إنك لازم تفصل… لازم تأخذ إجازة وما تفضلش قاعد قدام الشاشة ليل نهار… أحد الحاجات الجميلة اللي تعلمتها ونفعتني أني لما أكسب صفقتين ورا بعض أفوت الثالثة… وده لسببين… الأول إن احتمال الخسارة بيزيد لما عدد الصفقات الناجحة ورا بعض بـ يكبر… فبالطريقة دي بفوت الفرصة على الخساير إنها تيجي وتآكل المكسب… والسبب الثاني إني بفصل نفسي من السوق وأريح وده بـ يخليني متوازن أكثر فأعرف أدخل السوق ثاني وآخذ قراري وأنا مستعد نفسيا…
كمان كل كام أسبوع لازم أريح شوية… ولو كام صفقة من اللي أنا فوتهم كسبوا ما بزعلش وبـ أعتبر إن ده كان ثمن راحتي النفسية… وإني لما أكون مستريح حـ أقدر أواصل وأستمر في عمل الشيء اللي بحبه وهو المتاجرة في سوق المال…
كل مرة بتدخل صفقة في السوق بتعرض مشاعرك وفلوسك للاختبار… لما بتكسب أنت مش بس بتكسب فلوس وبس… لا أنت بتكسب كمان مشاعر فرحة… ولما بـ تخسر أنت مش بس بـ تخسر فلوس… لا أنت بـ تخسر سعادتك وبتكسب مشاعر زعل وحزن وندم… مكسب ورا خسارة ورا مكسب مشاعرك بـ تتلخبط وما بتبقاش عارف في المحصلة أنت فرحان ولا زعلان… وطبعا اللخبطة دي بـ تصب على قرارك الجاي… فتكون النتايج مش كويسة…عشان كدة لازم تفصل من السوق كل شوية وتعيد ترتيب نفسك…
يا رب تكون المقالة دي عجبتكم… وأتمنى أنكم تقروها ثاني وثالث ورابع لأنها حـ تفرق معاكم كثير…
