سؤال مهم، يا ترى البورصة إيه بالنسبة لك… إنت شايفها طريقة تحقق بيها دخل إضافي ومكسب مادي يغير من حياتك وحالتك الاجتماعية والمهنية؟ … ولا شايفها تسالي وقت الفراغ تتطلع فيها طاقتك وتفجر فيها حالة الغضب والزهق اللي جواك؟
لما كنت بدرس تحليل فني في جمعية أسهمي للتنمية كنت بقابل مضاربين كثير سواء في مجال الفوركس أو البورصة المصرية… ومن خلال كلامهم كنت بقدر أميز هما شايفين البورصة بـ أنهي وش… وش الهزار واللعب ولا وش الجد… عمري ما حـ أنسى بشمهندس أحمد اللي كان بـ يشتغل مهندس صيانة في أحد الشركات الكبرى وهو بـ يقول لي “الفوركس دي مُتعة”… ولما كنا بـ نتكلم معاه عن البورصة والفوركس كنت بشوف على وشه اهتمام كبير وكأنه قاعد قدام صاحبه اللي حـ يعرفه إزاي يكسب في جيم بلاي ستيشن… ولو جاله تليفون من الشغل بسرعة وشه كان بـ يتغير ويكشر وبعدين يرد على المُتصل بلهجة كلها قرف!… ده لو رد ومقفلش التليفون…
مش بس بشمهندس أحمد… كمان أستاذ وائل، وأيمن وغيرهم كثير كانوا بـ يتصرفوا بنفس الأسلوب… وشوشهم وطريقة كلامهم كانت بتقول هما قد إيه واخدين موضوع المضاربة كلعبة وتسالي بدل ما تكون جد وتخطيط…
ومن الملاحظات المهمة بالنسبة لي في الوقت ده إن البنات كانوا بـ يتصرفوا بطريقة مختلفة… فنادرا ما كنت أتحدث مع أي بنت أو ست بـ تدرس عندي وألاحظ عليها إنها وأخذه الموضوع لعب أو هزار… بالعكس معظمهم كانوا ملتزمين جدا بالتعليمات وبـ ينفذوا المطلوب منهم في الكورس بالحرف… يمكن لأن الأنثى بطبيعتها بـ تحس بالخوف من أي شيء غريب فبتفضل إنها تلتزم بالقواعد عن الابتعاد عنها… ويمكن لأنهم كائنات حساسة بطبيعتهم وعندهم قدرة إنهم يخفوا مشاعرهم الحقيقية أكثر من الشباب والرجالة…
طب إيه الطريقة اللي تقدر تحدد بالضبط إنت شايف البورصة إزاي؟ …
بتوع علم النفس عملوا اختبار صغير من عشر أسئلة عشان يساعدوا المضاربين إنهم يحددوا لو كانوا شايفنها جد ولا لعب… تعالى دلوقتي نشوف الاختبار ده…
اختبار الجدية في التعامل مع البورصة
قيّم كل من العبارات التالية برقم يعبر عن شعورك تجاه العبارة المذكورة… أضف التقييم بجانب العبارة… خليك واقعي وأمين مع نفسك قبل الإجابة… وخذ وقتك في التفكير…
| الدرجة | معنى الدرجة |
|---|---|
| 1 | أرفض بشدة |
| 2 | أرفض |
| 3 | أرفض بحياد |
| 4 | محايد |
| 5 | أوافق بحياد |
| 6 | أوافق |
| 7 | أوافق بشدة |
أسئلة الاختبار…
| 1- | أنا أستمتع بنشاطي في المضاربة لدرجة أن نتائج أدائي في السوق تمثل عنصر ثانوي بالنسبة لي | (_____) |
| 2- | أنا أفضل أن يتوسط فترة عطلتي ندوة تعليمية خاصة بالمضاربة في البورصة | (_____) |
| 3- | أنا لدي مصدر دخل يغطي خسائري في السوق | (_____) |
| 4- | أنا أشعر بالأمان المادي | (_____) |
| 5- | سوف أستمر في نشاطي داخل أسواق المال حتى لو امتلكت كل الأموال التي أريدها | (_____) |
| 6- | أحب الاستماع للأحاديث الاقتصادية | (_____) |
| 7- | المضاربة / الاستثمار مهم لي لأسباب لها علاقة بالضرائب | (_____) |
| 8- | علاقتي بالسمسار مهمة جدا بالنسبة لي | (_____) |
| 9- | أنا أستمتع بقراءة الأخبار والنشرات الاقتصادية | (_____) |
| 10- | التنبؤ بأسواق المال هو أحد هواياتي | (_____) |
بعد ما تخلص أجمع درجات كل الإجابات…
لو كانت إجمالي النقاط أقل من 40 فأنت تميل لأن تجعل من المضاربة عمل جدي بالنسبة لك…
لو كانت إجمالي النقاط ما بين 40 إلى 60 نقطة فأنت تعتبر المضاربة هواية أكثر منها مهنة…
ولو كان تقييم أعلى من 60 يبقى المضاربة بالنسبة لك مجرد لعبة بكل معنى الكلمة…
نتيجة الاختبار ده أكيد حـ تساعدك كثير على إنك تفهم نفسك أحسن وتحاول تحسن من مفاهيمك عن البورصة… واعرف أن أسواق المال بتدي كل واحد اللي هو عايزه… واللي شايفها لعب حـ تبسطه وتضيف لحياته لمسات من المتعة والتشويق والإثارة… واللي شايفها جد حـ تديله النجاح المادي اللي هو بـ يدور عليه… المهم حضرتك تكون عارف إنت عايز منها الجد ولا بتدور على اللعب والتسالي…
