1. أنا حأجاوب بالأدلة المنطقية … علما بإن اجابتي ليست فتوى … وأنا لست اعلم اهل الأرض بدين الله … ولكن دي الاجابة اللي عندي للي عايز يسمع لي
2. سؤال هل الفوركس حلال أو حرام يبدو سؤال بسيط من الظاهر … لكن الحقيقة هي أنه عميق جدا … ولو فضلنا نتجادل سنين يمكن ما نوصلش لإجابة قطعية … لكن من وجهة نظري أفضل اجابة هي المبنية على ادلة عقلية وليس نقلية … لأن ده مجال مستحدث زي الكثير من المجالات اللي ظهرت وحـ تظهر في المستقبل … وحتى الفرضية دي إنت ممكن تنتقدني فيها
3. هل الرافعة المالية قرض؟
الاجابة هي لا … لأنك لو رحت اي بنك وطلبت قرض البنك حيكون عايز ضمان … وقيمة الضمان لازم تكون أكبر من قيمة القرض … لكن في نظام الرافعة المالية والمارجن بيكون العكس … يعني حضرتك مثلا بتودع 1000 دولار برافعة مالية 1:500 … يبقى تقدر تعمل معاملات تسواي 500 ضعف رأس مالك … وهو عكس شروط التحوط في القروض البنكية … ممكن نقول ببساطة إن رأس مالك في مجال الفوركس يستخدم كـ ( عربون ) للصفقات
4. هل المارجن ربا؟
وفقا لرأي الأستاذ الدكتور سعد الدين الهلالي في موضوع ربا البنوك … وهو موضوع لا يختلف كثيرا عن موضوع مارجن شركات الفوركس … الربا المحرم هو ربا النسيئة … وربا النسيئة في الجاهلية كان عبارة عن خطة يستخدمها المقرض لشراء عبودية المقترض من خلال السيطرة على حياته المادية … وممكن ترجعوا لقناة دكتور سعد الدين الهلالي
ما يحدث في سوق الفوركس هو أن المتداول بيكون على علم تام بكل شروط شركة التداول من قبل ما يفتح حساب معاهم … وبيكون عنده حرية الفتح من عدمه … بيوافق على الشروط والاحكام قبل ما يفتح حساب التداول … يبقى مفيش استغلال لا ظاهر ولا باطن … ومعظم المشاكل اللي بنشوفها في السوق بتكون بسبب جهل المتداولين بشروط التداول في الشركات وعدم اطلاعهم على الشروط والاحكام قبل الأقدام على فتح الحسابات
5. هل ممكن اشتغل برافعة مالية 1:1 أو بدون رافعة مالية خالص؟
أولا ما ينفعش تشتغل في سوق العملات بدون رافعة مالية … لأن أقل حركة سعرية في السوق هي النقطة point … وكل نقطة تساوي 0.00001 من الدولار … يبقى عشان ساعدتك تحقق مكسب من السوق لازم تدخل برأس مال كبير جدا يعوض ضعف قيمة النقطة … وهنا يجي دور بروكر الفوركس اللي بيسلفك فلوس ويكبر رأس مالك … وبالتالي تحقق ربح من حركات السوق
العملات الرئيسية في سوق الفوركس … زي اليورو والين والاسترليني … هي عملات مستقرة جدا … يعني أنت اصلا بتتداول على أزواج عملات تقريبا مش بتتحرك في السنة غير من 5 إلى 10 في المية … يعني شبة ثابته يوميا وأسبوعيا … فعشان تحقق منها ربح لازم يكون رأس مالك كبير زي البنوك المركزية … ولو أنت مش بنك أو مؤسسة مالية يبقى مش حتقدر تشتغل في سوق العملات من غير بروكر يدعمك ماليا
اخيرا فيه ناس مفكرة إن الرافعة المالية 1:1 معناها إن مفيش رافعة مالية … وده طبعا كلام غلط تماما … معنى رافعة مالية 1:1 هو أنك بتأخد من البروكر قد رأس مالك … يعني لو رأس مالك كان 1000 دولار حيظهر على الشاشة 2000 … وطبعا دول مش حينفعوا يعملوا لك أي حاجة في سوق الفوركس … وبرضوا أنت اشتغلت بالرافعة مالية اللي مفكر إنك هربت منها
كمان البروكر المحترم بيكون عامل جدول للروافع المالية … بحيث يدي رؤوس الأموال الصغيرة روافع مالية كبيرة … وبالعكس اصحاب رؤوس الأموال الكبيرة بيأخدوا من البروكر ورافع مالية صغيرة … بكدة يكون فيه توازن بينهم
6. هل فوائد التبيت Swap حرام؟
أولا في سوق الفوركس احنا مش بندفع فائدة بالمعنى الصريح … احنا بندفع أو بناخد فرق الفائدة بين العملة المباعة والعملة المشتراه … يعني مثلا لو حضرتك شاري اليورو وبايع الدولار … وكانت فائدة اليورو مثلا 6% سنوي … وفائدة الدولار 5% سنوي … فأنت حتكسب 1% اللي هو فرق الفائدة بين العملتين
لفظ معدل الفائدة Interest Rate معناه بالإنجليزية ( نسبة الاصلاح ) … يعني مقدار الورق النقدي اللي بيعوض الانخفاض أو الارتفاع في قيمة العملة … والهدف منه هو الحفاظ على قيمة العملة من الارتفاع أو الانخفاض … والنتيجة هي تحول الأموال الورقية لمخزن للقيمة
يعني مثلا … لو أحمد كان معاه 10000 جنية محوشهم عشان يشتري موبايل … لكن صاحبة عمرو كان استلفهم منه لظروف شخصية ووعد أحمد إنه يرد الفلوس بعد سنة … وبعد سنة فعلا عمرو أوفى بوعده لأحمد ورجع له الـ 10000 جنية … ولما راح احمد يشتري الموبايل لقى إن سعره زاد لـ 12000 جنية بالتالي مقدرش يشتريه … هنا لو كان عمرو رجع لأحمد الفلوس زائد قيمة الاصلاح ( الفائدة ) كان ممكن إن أحمد يشتري الموبايل ويتحقق العدل في المعاملة
نفهم من القصة السابقة انه طول ما معدل الفائدة يعادل التضخم في الأسعار يبقى الفوائد بتصلح من قيمة العملة … يعني مفيش تربح منها … ولكن لو معدل الفائدة كان مختلف عن قيمة التضخم/الانكماش في العملة يبقى ده يعتبر تربح
عموما … ولو ما زال عندك شك في النقطة دي فممكن تفتح حساب اسلامي بدون Swap وتريح دماغك وقلبك … وكل شركات الفوركس اللي بتتعامل مع العرب عندها حسابات إسلامية … يعني الموضوع متاح وسهل … طب ليه ما نعملوش ونريح نفسنا
7. هل التداول على عقود الـ CFDs حرام؟
عشان نفهم الموضوع لازم نعرف الأول ان CFDs هي اختصار لـ Contract for Differences … يعني عقود الفروقات … يعني عقود أنت بتمتلكها بيعا وشراء لتغطي أو تحاكي الفروق السعرية للأوراق المالية … وركز في كلمة بـ (تمتلكها) دي
الناس اللي بتحرم هذه العقود بتقول إنك مش بتمتلك حاجة … يعني لما تشتري عقود EURUSD فأنت في الحقيقة مش بتمتلك يورو … وده حقيقي … والشركة في الغالب قالت لك من البداية إنك ماضي معاهم عشان تتدوال في عقود … يعني سعادتك داخل تبيع وتشتري حاجة اسمها عقود … يعني انت بتمتلك عقود … ومحدش جاب سيرة اليورو أو الدولار … صح كدة … وانت بتبيع وتشتري ما تملك وهو العقود … صح كدة
وخلي بالك إن عملية البيع والشراء بتتم بصورة فورية وبدون أي تأجيل … عشان سوق الفوركس سوق لحظي Spot … وليس آجل مثل سوق عقود المستقبليات Futures أو سوق الخيارات Options
8. الفوركس حرام عشان البيع المكشوف وإنك بتبيع ما لا تملك؟
بص يا غالي … في سوق الفوركس فيه حاجة اسمها عملة الحساب Deposit currency … ودي العملة اللي بتفتح بيها الحساب … واحنا كعرب في الغالب بنختار الدولار … وإن كان فيه عملات ثانية متاحة زي الين والاسترليني
لما سعادتك بتطلب مثلا من بروكر الفوركس إنك تشتري EURAUD فالبروكر بيدخل يعمل صفقتين في نفس الوقت … بيدخل يشتري EUR ويدفع بالدولار بتاعك … وبيدخل يبيع AUD من عنده ويحط في حسابك USD … يعني بيعمل عمليتين في نفس الوقت … شراء EURUSD … وبيع AUDUSD … والعكس في حالة البيع … وكلة بيتم لحظي لأنه سوق Spot … تمام
يبقى فين البيع المكشوف في الموضوع … مش موجود … أنت بتبيع ما تملك وتشتري ما تملك … ومفيش حد سلفك حاجة عشان تبيعها
معظم الناس بتخلط بين نظام البيع في منصات الفوركس ونظام البيع المكشوف في سوق الاسهم … وبينسوا إن التداول في سوق الفوركس مبني على ازواج … وفي كل عملية انت بتبيع عملة وتشتري عملة ثانية في نفس الوقت … لأن دي أزواج زي الـ EURUSD – USDJPY … وهكذا … فياريت نتعلم الحاجة اللي بننتقدها عشان نوفر وقت ومجهود
9. الفوركس حرام عشان بتخسرنا فلوس؟
الفوركس تجارة مبنية على المنافسة … وأي مجال في الدنيا فيه منافسة مش حتلاقي فيه كل الناس بتكسب … هو عدد محدود من الناس اللي بتكسب والباقي لا … والكلام ده في أي تجارة سواء كانت توكيلات صناعية أو مراكز خدمية … العالم مش حيكون فيه غير ايلون ماسك واحد … لأن هي دي طبيعة المنافسة
أسواق المال هي جزء من الفكر الرأس مالي … اللي شايف إن المنافسة بتطلع من الانسان أحسن ما عنده … على عكس النظام الاشتراكي اللي بيعتمد على توكل الانسان على الدولة في كل حاجة من الأبرة للصاروخ
والفوركس تبقى حرام لو المنافسة غير شريفة … وفيها انحياز لفئة معينة … لكن لو المنافسة عادلة ومبنية على الشفافية يبقى مفيش فيها أي حرمانيه … ونفس الكلام ينطبق على أي مجال تجاري آخر سواء خدمي أو صناعي … مباشر أو غير مباشر
10. أخيرا لازم تكون عارف إنه مفيش آيه قرآنية أو حديث قدسي أو شريف بينص صراحة على أن تجارة العملات الحديثة المعروفة باسم الفوركس حرام … وكل شخص بيفتي بإن الفوركس حرام فهو من قبيل الاجتهاد الشخصي في التفسير والتأويل … يعني من الآخر يوم القيامة ربنا مش حيدخلك أو يدخلني النار عشان كنت بتتاجر في الفوركس
الفوركس هي سوق العملات … والهدف الرئيسي من وجود هذا السوق هو ( تسعير العملات ) … وبدون فوركس محدش حيعرف يبيع ولا يشتري … تجار الفوركس بيقدموا خدمه جليلة للمجتمع من خلال التحديث اللحظي للأسعار … ولولا هذا التسعير لا كان بقى فيه تصدير ولا استيراد ولا أي نشاط على أرض المجتمع … ومحاولات استبدال تسعير الفوركس بالتسعير الجبري ستنتهي بالسوق السوداء بسبب عدم حرية العرض والطلب
الفوركس مجال تجاري وله دور في المجتمع … ولولا تجارة الفوركس مكنش حد عرف يصدر بكام او يستورد بكام … وجميع محاولات تحريم هذا العمل مردود عليها … وفي النهاية دي وجهة نظري … وكل واحد له عقل مريحه … فلو ساعدتك شايف إن كلامي مقنع يبقى أهلا وسهلا بك
